Есіл ауданындағы үш мемлекеттік органда мемлекеттік аудит жүргізілді. Оның қорытындысы бойынша 53 әкімшілік материал жинақталды, деп хабарлайды Qyzyljarnews.kz тілшісі.
Тексеру комиссиясының ақпаратына сәйкес, экономика және қаржы, жер қатынастары бөлімдері мен мемлекеттік кірістер басқармасында аудит жүргізілді. Аудан бюджетіне жекелеген кіріс көздерінің түсімдерін жоспарлау, салықтық әкімшілендірудің тиімділігі тексерілді. Жалпы сомасы 102 млн. теңгеден асатын қаржылық, рәсімдерді орындау тәртібінде 19 бұзушылық анықталды. Оның ішінде жергілікті бюджеттің кірістерін болжау кезінде салық органдарына және басқаларға жүктелген міндеттерді толық көлемде орындамау фактілері тіркелді. Бұл жергілікті бюджетке кірістердің толық емес және уақытылы түспеуіне әкеліп соқтырды. Ауданның мемлекеттік органдары жер учаскелерінің сатып алу құнын уақытылы төлемеу фактілері бойынша тұрақсыздық айыбын өндіріп алуды қамтамасыз етпеді.
— Мемлекеттік аудит нәтижелері бойынша мемлекеттік кірістер басқармасына 53 әкімшілік материал жинақталды. Осылайша 39 әкімшілік жаза қарастырылып, 443,1 мың теңге сомасында айыппұл салынды. Сондай-ақ ескерту түрінде 14 әкімшілік жаза тағайындалды. Анықталған бұзушылықтарды жою туралы нұсқама берілді, — деп хабарлайды тексеру комиссиясы.
