Енді автосалоннан жаңа көлік сатып алғанда, көлік құралын тіркеу үшін мамандандырылған ХҚКО-ға жүгінудің қажеті жоқ, деп хабарлайды Qyzyljarnews.kz тілшісі.
Автосалонда тікелей автокөлікті тіркеуге, мемлекеттік нөмірді таңдауға және техникалық паспортты рәсімдеуге болады. Бұл ретте құжаттарды Мемлекеттік корпорация қызметкері қабылдайды. Бүгінгі таңда пилоттық жоба «Hyundai Petropavlovsk» автосалонында іске қосылды. Бұл туралы «Азаматтарға арналған үкімет» Солтүстік Қазақстан облысы бойынша филиалында айтылды.
– Бұрын жаңа автокөлікті сатып алғанда, азаматтар Мамандандырылған ХҚКО-ға баруға мәжбүр болды. Енді автосалонда біздің қызметкеріміз құжаттарды қабылдайды. Біз көрсетілетін қызметті алушылар үшін сервисті әр уақытта жақсартудамыз,- деді «Азаматтарға арналған үкімет» мемлекеттік корпорациясы» КЕАҚ Солтүстік Қазақстан облысы бойынша филиалының директоры Еркін Жұмабай.
Петропавл қаласының мамандандырылған ХҚКО-да 2024 жылдың басынан бері 1860 көлік тіркелді.
