Солтүстікқазақстандық боксшы Евгений Павлов кәсіпқой былғары қолғап шеберлері арасындағы жекпе-жектерде 6 мәрте жеңіске жеткен. Ол жасөспірімдер және жастар арасындағы Қазақстан чемпионы әрі ересектер арасында өткен чемпионаттың финалисі. Сонымен қатар, кикбоксингтен Қазақстанның төрт дүркін чемпионы, әлем чемпионы, WBA International белбеуінің иегері атанды. Бүгінгі онлайн форматта ұйымдастырылған жиында теріскейлік азамат боксқа қалай келгенін баяндап, соңғы жеңісімен және келешекке қойған жоспарларын айтты, деп хабарлайды Qyzyljarnews.kz тілшісі.
Евгений Павловтың бокска деген қызығушылығын оятып, бүгінгідей жетістікке жетуіне достары себепші болған. Өңір мақтанышының алғашқы жаттығуына 8 жасында қатарластары ертіп апарыпты. Бапкерлер де бозбаланың икемі барын бірден аңғарған екен. Бүгінде Евгенийдің бокспен айналысып жүргеніне 14 жыл толып отыр. Бокстан Солтүстік Қазақстан облысының аға жаттықтырушысы Денис Языковтың айтуынша, Евгений Павлов спорттың кез келген түрінде жетістікке жетер еді.
-Евгениймен дер кезінде танысқанымызға қуанамын. Ендігі кезекте әлемнің барлық титулдарын жеңіп алуды көздеп отырмыз. Евгенийдің тынымсыз еңбегі мен жеңіске деген ұмтылысының және «SuleimenPromotions» ұйымының қолдауымен ойлаған мақсаттарымызға жетеміз деген сенімдемін,-деді Денис Языков.
Жерлесіміз өзінің спорттық жолында әлем чемпионы атанған филиппиндік боксшымен кездесуі қиынға соққанын жасырмады. Евгений Павлов соңғы рет кәсіпқой деңгейдегі рингке өткен жылдың желтоқсан айында шықты.
Боксшы былтыр Нұр-Сұлтан қаласында Гана елінің спортшысымен өткен жекпе-жек ерекше есінде қалғанын айтады. Онда Евгений Павлов WBA International белбеуін иеленген.
-Евгенийдің бұл атаққа қол жеткізетініне әуел бастан сенімді болдым. Сонда да, бокс спорттың ауыр түріне жататындықтан, қобалжу болғаны рас. Бірақ, біз бұдан біршама биік белестерді бағындыруды жоспарлап отырмыз,-дейді облыстың бас бапкері Денис Языков.
Евгений Павлов ешкімге еліктегісі келмейді. Дегенмен, әдіс-тәсілдер үйренетін кәсіпқой боксшыларының барын айтады. Солтүстікқазақстандық спортшы қазір келесі жекпе-жегіне қызу дайындық үстінде. Бұл кездесу шамамен сәуір айында өтуге тиіс. Әзірге, нақты күні белгісіз.
