Франция астанасы Париж қаласында өтіп жатқан Олимпиада ойындарында қазақстандық ескекшілер Тимур Хайдаров пен Сергей Емельянов іріктеу сайысында бақ сынады, деп хабарлайды Qyzyljarnews.kz.
Нақтырақ айтсақ, Тимур Хайдаров пен Сергей Емельянов екі адамдық каноэмен 500 метрге сынға түсті. Нәтижесінде отандастарымыз мәре сызығын 1 минут 45, 94 секунд көрсеткішімен бесінші болып кесті. Бұл сында алты жұп қатысқан болатын. Үздік нәтиже көрсеткен екі жұп жартылай финалға тікелей жолдама алды. Тимур Хайдаров пен Сергей Емельянов ширек финалда сынға түсу мүмкіндігіне ие болды.
Айта кетсек, осыған дейін Сергей Токио Олимпиадасында, ал Тимур Рио Олимпиадасында сынға түскен болатын. Бұл Париж Олимпиадасы екі спортшымыздың да екінші ойыны.
Естеріңізге сала кетейік, Франция астанасы Париж қаласында өтіп жатқан XXXIII жазғы Олимпиада ойындары 11 тамызда мәресіне жетеді. Ойынға әлемнің 205 елінен 10 500 спортшы қатысып жатыр.
