Өткен жылдың ұқсас кезеңімен салыстырғанда азық-түлік тауарлары – 6, азық-түлік емес тауарлар 8, ақылы қызметтер 14 пайызға өсті.
Ұлттық статистика бюросы Солтүстік Қазақстан облысы бойынша департаментінің мәліметінше, былтырмен салыстырғанда баға айтарлықтай өскен. Мәселен жемістер – 20, жаңа ауланған немесе салқындатылған балық 12, тоқаш және ұннан дайындалған кондитер өнімдері 7 пайызға қымбаттаған. Күріш бағасы – 27 пайызға өскенімен, жалпы жармалар 24 пайызға арзандап отыр.
Темекі өнімдері – 19, алкогольді ішімдіктер – 13, алкогольсіз сусындар 7 пайызға қымбаттаған. Көкөністердің бағасы 9 пайызға өсті, соның ішінде қияр құны – 36, картоп 29, сәбіз 6 пайызға артқан. Қант биыл 4 пайызға арзандады.
Жеке тұтынуға арналған тауарлар мен приборлардың бағасы – 13, киім және аяқ киім 9, фармацевтикалық өнімдер 9 пайызға өсті. Мотор майы — 12, сұйытылған газ 9 пайызға қымбаттады.
Байланыс қызметтеріне баға 3 пайызға өсті, оның ішінде ұялы байланыс қызметтерінің құны бір жыл ішінде 21 пайызға артып отыр. Демалыс, ойын-сауық және мәдениет саласындағы қызметтер — 7, қоғамдық тамақтандыру орындарының қызметтері 12 пайызға қымбаттады. Шаштараз және жеке қызмет көрсету мекемелері қызметтерінің құнын 18 пайызға өсірді.
