Бүгін Петропавл қаласының вокзалында облыстық дене тәрбиесі және спорт басқармасының, облыстың спорт ұйымдарының өкілдері, жаттықтырушылар мен спортшылар грек-рим күресінен әлем чемпионы Ислам Евлоев пен оның жеке жаттықтырушысы Қонысбек Түкеновті қарсы алды.
Грек-рим күресінен Испанияда өткен U20 әлем чемпионатында 82 килограмм салмақ дәрежесінде Ислам барлық қарсыластарын айқын жеңіп, алтыннан алқа таққан болатын. Соңғы жекпе-жекте ол түрік балуаны Алперен Берберді тізе бүктірді.
Чемпионды кезінде ол білім алған Солтүстік Қазақстан облыстық олимпиадалық резервтегі мектеп-интернат-колледждің, жоғары спорт шеберлігі мектебінің өкілдері де қарсы алды. Чемпион мен оның жаттықтырушысының қойны гүлге толды.
Исламның жеке жаттықтырушысы Қонысбек Түкенов жиналғандарға алдағы төрт жылдағы мақсаттары лицензияға қол жеткізіп, Олимпиадаға қатысып, жүлдегерлер қатарынан көріну екенін айтты.
