«Жетімін жылатпаған, жесірін қаңғытпаған» халқымыз үшін жақсылық жасау – игі іс. Жығылғанға сүйеу, жылағанға тіреу болу – кез келген адамның қолынан келе бермейтін ізгі қасиет. Тағдырдың жазуымен дерт тауқыметін бастан кешіп, қамкөңіл күйде өмір сүріп жатқан ерлі-зайыпты Қанат Хамзин мен Жаңыл Әленова жүректері мейірімге толы жомарт жандардың қолдауының арқасында жақында баспаналы болды.
Қызылжар ауданына қарасты Бәйтерек ауылында тұрып жатқан ерлі-зайыптылардың қуанышында шек жоқ. Өйткені егде жастағы қос қария баспана тауқыметін біраз тартқан. Есіл ауданындағы Новоузенка ауылында 1952 жылы салынған баспаналары тұруға жарамсыз болған соң, 2023 жылы Бәйтерекке көшіп келген екен. Бастапқыда пәтер жалдаған. Көп ұзамай үй иесі баспананы босатуды талап етіпті. Далада қалған қос қария ауыл әкімінен көмек сұрай барады. Қызылжар ауылдық округінің әкімі Ринат Шұғайыпов балалар үйінде тәрбиеленген жандарға көмек қолын созуға уәде беріпті.
– Жұбайым — екінші топтағы мүгедек. Өзімнің де денсаулығым мәз емес. Бізге қарайласатын баламыз, не жақындарымыз жоқ. Барар жеріміз, басар тауымыз болмаған соң Қызылжар ауылдық округінің әкіміне жүгіндім. Мамандар Бәйтерек ауылындағы Ихсан мешітінің жанында орналасқан асхананың кем-кетігін жөндеп, бізге табыстады. Осындай бақытты сәтті біз ұзақ күттік, – деп ағынан жарылған Жаңыл Әленова қуаныштан көз жасына ерік берді.
Ол қарттар мен мүгедектерді қолдау айлығы қарсаңында қос қарияның арманын орындаған ауылдағы мешіт имамы Бақыт Сыздықов пен жөндеу жұмыстарына атсалысқан әкімдік қызметкерлеріне алғысын жеткізді. Мешіт жанындағы бос тұрған асхананы баспана ретінде қалыпқа келтіруге ауылдық әкімдік қызметкерлері ғана емес, ерлі-зайыптылардың таныстары да қол ұшын бергенін айту қажет. Үйге жаз бойы жөндеу жұмыстары жүргізілген. Жақсылық жасап жарысқан жомарт жандардың арқасында енді олар қыстан қысылмай шығатын болды.
Ақмарал ҚҰРМАНАЙҚЫЗЫ,
«Soltüstık Qazaqstan».
Суретті түсірген
Шыңғысхан БЕКМҰРАТ.
