Петропавлда әлемдік додалардың чемпиондары және 5-ші Дүниежүзілік көшпенділер ойындарының жүлдегерлері марапатталды. Облыс әкімі Ғауез Нұрмұхамбетов жеңімпаздарға пәтер кілттерін табыс етті. Жаттықтырушылар да ұмыт қалған жоқ.
Спортшыларымыздың байрақты бәсекелерде жоғары нәтижеге қол жеткізуі ел мерейін өсірді.
«Облыс тарихында біздің спортшылар алғаш рет осындай жоғары нәтижеге қол жеткізіп отыр. Олар өскелең ұрпаққа үлгі. Бапкерлерге де алғысым шексіз. Нағыз спортшыларды баптап, аламанға үкілеп қосу жоғары шеберлікті талап етеді», — деді облыс әкімі Ғауез Нұрмұхамбетов.
Қазақ күресінен әлем чемпионы Алтынбек Аусағитовке, грек-рим күресінен әлем чемпионы Ислам Евлоевқа және Қытайдағы Азия ойындарының жеңімпазы, былғары қолғап шебері Наталья Богдановаға пәтер сыйға берілді.
Астана қаласында өткен 5-ші Дүниежүзілік көшпенділер ойындарында қазақ күресі бойынша ел намысын сәтті қорғаған Мейіржан Берекетов облыс әкімінің Алғыс хаты мен ақшалай сертификатына ие болды. «Ұлттық құрама өзіне берілген тапсырманы орындап шықты. Мен 60 килограмм салмақ дәрежесінде жеңімпаз атандым. Тынымсыз еңбектің арқасында осындай жетістікке жеттік», — дейді Мейіржан Берекетов.
Жоғары нәтиже көрсеткен спортшылар ғана емес, жаттықтырушылар да Құрмет грамоталарымен, Алғыс хаттармен және ақшалай сертификаттармен марапатталды.
