Облыстық тарихи-өлкетану музейінің 100 жылдығына орай “Отырар” мемлекеттік археологиялық музей-қорығының “Отырар – ғасырлар тоғысында” атты көрмесі солтүстікқазақстандықтарға есігін айқара ашты.
СҚО мұражай көрме
Фараб-Отырар өркениетінің тарихи-мәдени мұрасын және оның әлемдік мәдениеттегі маңызын дәріптеу мақсатында ашылған көрмеде І-ХVIII ғасырларға жататын жәдігерлер – саздан жасалған үй бұйымдары, қаптау кірпіштері, зергерлік бұйымдар, шыны және мыс ыдыстар, күміс монеталар және тағы да басқа заттар ұсынылған. Сонымен қатар мұнда құнды құжаттармен, фотоматериалдармен, сәулет, білім және өнер саласындағы жетістіктермен танысуға болады. Көрмені тамашалаған адам Әбу Насыр әл-Фарабидің отаны ретінде танылып қана қоймай, VI-VIII ғасырларда орта Сырдариядағы ірі феодалдық меншіктің астанасы, IX-XII ғасырларда округтің басты қаласы болған, XVI-XVII ғасырларда Қазақ хандығының саяси және экономикалық орталығына айналған Отырардың тарихынан біраз мағлұмат ала алады.
– Оңтүстік Қазақстандағы Арыс және Сырдария өзендерінің түйіскен жерінде орналасқан Отырар оазисі “Жібек жолының” бірнеше тарихи тармақтарының, сауда жолдары мен мәдени және технологиялық алмасу бағыттарының қиылысу торабында орналасқан. Көрнекті археологиялық ескерткіштері бар шаһар Қазақстан мен жалпы Орталық Азия өңірінің тарихын зерттеу үшін мәдени-тарихи маңызға ие, – деді “Отырар” музей-қорығының бас сақтаушысы Нұрсұлтан Бекешев.
Көрме қазан айының соңына дейді жұмыс істейді.
Самрат ҚҰСКЕНОВ.
