Ғабит Мүсірепов атындағы ауданда төтенше жағдай орын алды. Желтоқсан айының ортасында көпір қақ бөлініп, жүк көлігі Есіл өзеніне түсіп кеткен.
Абырой болғанда, жүргізуші дін аман. Бидай тиеген жүк көлігі өткелден өтпек болған. Сол мезетте осы ауданға қарасты Бірлік пен Нежинка ауылдарын жалғап тұрған көпір қақ айырылған. Белгілі болғандай, бұл өткелді жергілікті шаруашылықтардың бірі салған, ол ауыр техникаға арналмаған. Қазір жүк көлігі судан шығарылды. Әзірге екі ауылдың тұрғындары айналма жолды пайдалануға мәжбүр болуда.
Екі ауылды жалғастыратын жаңа көпірдің құрылысына жобалық-сметалық құжаттама әзірленген, қазіргі уақытта ол мемлекеттік сараптамадан өткізіліп жатыр. Ал аудандық полиция қызметкерлері «Shacman» автокөлігінің 56 жастағы жүргізушісі рульге ие бола алмай көлік аударылып, Есіл өзеніне құлағанын анықтаған. Оқиғаның өзге де мән-жайын анықтау үшін полиция істі тергеуді бастаған.
