Облыстық әкімдік жанынан Азаматтарды қабылдау орталығы ашылды. Жаңа орталық «Халық үніне құлақ асатын мемлекет» тұжырымдамасын іске асыру және Президенттің халықпен жұмысты қайта форматтау тапсырмасын орындау аясында құрылды.
Жаңа фронт-кеңседе келушілер үшін барлық қолайлы жағдай жасалған. Азаматтар кез келген мемлекеттік органға өтініш беріп, басшылықтың жеке қабылдауына жазылып, кеңес алу мүмкіндігіне ие.
– Мемлекеттік органдардың міндеті – азаматтардың мәселесін тыңдап, оңтайлы шешімін табуға тырысу. Сондықтан орталыққа түскен бірде- бір өтініш назардан тыс қалмауы керек. Халықтың пікірі шешімдерді әзірлеуде және қабылдауда ескерілуі тиіс. Бірыңғай диалог алаңы мемлекеттік құрылымдар мен халық арасындағы сенімді қарым-қатынасты нығайтпақ. Өтініштерді тыңдап, ше- шім қабылдауда ашықтық, жедел әрекет ету басты орында болуы тиіс, – деді орталықтың жұмысымен танысқан облыс әкімі Ғауез Нұрмұхамбетов.
Фронт-кеңседегі жұмыс автоматтандырылған. Орталық азаматтармен байланыстың бірыңғай экожүйесін қалыптастырып, қоғамның сұранысын дәлірек анықтайды. Өтініштерді талдау азаматтардың қажеттіліктерін тереңірек түсініп, биліктің жұмысын жоспарлауға және бюджетті анықтауға негіз болмақ.
Гүлфайруз ТӨРЕМҰРАТОВА
