Жаңа жыл қарсаңында Мағжан Жұмабаев ауданында бірнеше жаңа медицина нысаны пайдалануға берілді. Бұл медицина мекемелері «Ауылдық денсаулық сақтауды жаңғырту» ұлттық жобасы аясында салынып отыр. Бұл жоба шалғай елді мекендердегі тұрғындардың медициналық қызметтерге қолжетімділігін қамтамасыз етуге бағытталған.
Жалпы биыл аудан тұрғындарының игілігі үшін Чистовское мен Советское ауылдарында фельдшерлік-акушерлік пункттер пайдалануға берілсе, Таманское, Бәйтерек және Надежка елді мекендерінде медициналық пункттер ашылды. Тағы да айта кетерлігі, өткен жылы Возвышенка мен Қарақоға ауылдарында дәрігерлік амбулаториялар іске қосылған болатын.
Аудан әкімі Рахат Смағұлов жаңа медицина мекемелелерінің жұмысымен танысып, олардың жергілікті халық үшін маңыздылығын атап өтті.
— Надежка ауылындағы жаңа медпункт – заманауи медициналық қызметтердің орталығы болып табылады. Медпункттің ашылуы ауыл тұрғындарына сапалы медициналық қызметтерді қолжетімді етпек. Ол үшін мекемеде білікті дәрігер, санитарлық көлік, барлық қажетті медициналық құрал-жабдықтар мен дәрі-дәрмектер бар. Ауылдарда медицина ұйымдарын ашу — мемлекеттік саясаттың басым бағыттарының бірі. Ел Президенті оған үлкен назар аударып отыр. Үкімет те жыл сайын қомақты қаржы бөліп, қазақстандықтардың әл-ауқатын дамытуға, сапалы медициналық көмекті нығайтуға ерекше көңіл бөліп келеді, — деді Рахат Назымбекұлы.
Шынында да ауылдықтар үшін жаңа медицина нысанының ашылуы — үлкен оқиға. Ашылу салтанатына қатысқан ауыл тұрғындары ерекше қуаныштарын жасырмады.
— Біз жыл сайын мемлекет тарапынан ауылдық елді мекендердің дамуына үлкен назар аударылып келе жатқанын көріп отырмыз. Біздің Надежка ауылында көше шамдары орнатылып, кентішілік жолдары жөнделуде. Мектеп, Мәдениет үйі жөндеуден өтіп, сүтті-тауарлы ферма, балалар ойнау алаңы, саябақ сияқты көптеген әлеуметтік нысандар салынды. Бір сөзбен айтқанда, мемлекет тарапынан ауыл халқы үшін барлық дерлік жағдай жасалынып отыр. Біз қуаныштымыз. Еліміз аман болып, одан әрі гүлдене берсін, — деп ауыл тұрғыны Ұмсындық Нұрышева ағынан жарылды.
Еркін ТӨЛЕГЕН
«Мағжан жұлдызы»
