Былтыр Қызылжар өңірінде бұрын-соңды болмаған алапат су тасқыны болып, көптеген шығындар орын алған еді. Бүгіндері облысымызда 2025 жылғы су тасқынына дайындық шаралары белсенді жүзеге асырылуда. «Аймақтың су тасқыны кезеңінде қауіпсіздігін қамтамасыз ету мақсатында кешенді жұмыстар қолға алынып, жоспарланған іс-шаралардың 90 пайызы орындалған», деп хабарлайды облыстық төтенше жағдайлар департаментінің баспасөз қызметі.
Облыс аумағында су тасқынының негізгі қатерлерін өзендер (Есіл, Шағалалы, Сілеті, Қамысты) мен олардың салалары (Ақанбұрлық, Бабықбұрлық, Шарық, Жембарақ, Имамбұрлық) тудыруда. Сондай-ақ, көлдердің тасуы, беткі қар суларының жиналуы да аймақтағы су тасқыны қаупін арттырып отыр.
Өткен жылдардың тәжірибесіне сүйене отырып, су тасқыны қаупі бар 116 елді мекен ерекше бақылауға алынған. 2024 жылғы су тасқыны кезеңінен кейін облыста кешенді жоспар әзірленіп, «2024 жылғы жаз-күз маусымындағы инженерлік жұмыстар жоспары» бекітілді. Бұл жоспар 2025 жылғы су тасқынына дайындықты қамтамасыз етуге бағытталған.
Осы жоспар аясында мынадай ірі көлемдегі жұмыстар жүзеге асырылды: ұзындығы 79 шақырымды құрайтын қорғаныс валдары мен дамбалары салынып, нығайтылды; автокөлік жолдарында 107 су өткізу құбырлары мен түтіктер орнатылды; 10 шақырымнан астам су ағызатын арықтар мен каналдар тереңдетіліп, тазартылды; өзен арналарының 4 шақырымнан астам бөлігі тазартылды; 214 шақырым жауын-шашын суын ағызатын жүйе тазартылып, жөнделді.
Сонымен қатар, 58 елді мекенді су тасқынынан қорғауға және қауіпті аймақтарда су деңгейінің көтерілу қаупін төмендетуге мүмкіндік беретін шаралар іске асырылды.Су тасқыны кезеңінде қорғаныс валдары мен дамбалар тұрғындардың қауіпсіздігін қамтамасыз етіп, шаруашылық нысандарын қорғауда шешуші рөл атқарады. Су өткізу құрылғыларын орнату судың еркін ағуына жағдай жасап, тасқынның салдарын азайтуға көмектеседі. Өзен арналары мен арықтарды тазарту су тасқыны қаупін төмендетеді және су өткізу қабілетін арттырады.
Облыстық төтенше жағдайлар департаменті өңір тұрғындарын су тасқыны кезеңінде сақтық шараларын ұстануға шақырады. Қар суларының жиналуы мен өзен деңгейінің көтерілуі мүмкін аймақтарда тұратын азаматтарға арнайы хабарландыруларға назар аударып, қажетті дайындық шараларын қабылдау маңызды. Су тасқынына дайындық және оны бақылау мәселесі облыстық төтенше жағдайлар департаментінің ерекше бақылауына алынған.
QYZYLJAR NEWS
