Облысымызда 14 құрылыс компаниясы жергілікті «Qyzyljar Asar» корпоративтік қорынан тиісті қаражатты ала алмай отыр. Облыстық кәсіпкерлер палатасы баспасөз қызметінің мәліметінше, бұл мәселе кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңесте талқыға түскен.
Былтыр маусым айында «Бірлік» шағын ауданында үйлерді салу үшін 14 құрылыс компаниясы, облыс әкімдігінің құрылыс, сәулет және қала құрылысы басқармасы және «Qyzyljar Asar» корпоративтік қоры келісімшартқа отырған. Зардап шеккендердің барлығы 1 қазанда жаңа үйлеріне қоныстанған.
— Жұмыс толық, әлі сапалы орындалуына қарамастан, компаниялар әлі толық төлем алған жоқ. Іс жүзінде төлем жасалды, мысалы, «Ash stroy» ЖШС орындалған жұмыстардың 25% үшін ғана ақша алды. Ал үйлер өткен жылдың қазан айында пайдалануға берілді, — дейді СҚО кәсіпкерлер палатасының сарапшысы Ольга Достлер.
Маманның айтуынша, «Qyzyljar Asar» жеке корпоративтік қоры кәсіпкерлік қызметпен айналыспайды, жеке жарналар есебінен жұмыс істейді. « Біз назар аударған екінші мәселе, бизнес субъектілері шарт талаптарына сәйкес құрылыс басқармасының әрекеттеріне толығымен тәуелді. Тапсырыс беруші кәсіпкерлерден құжаттарды қабылдайды, өз бетінше толық пакетті қалыптастырады, сосын төлеушіге, яғни қорға жібереді. Осылайша, кәсіпкерлер бұл рәсімге қандай да бір түрде әсер ете алмайды және құжаттарды қорға тікелей жібере алмайды», — дейді Ольга Достлер.
Қол қойылған үшжақты шартқа сәйкес кәсіпкерлер жүктелген барлық міндеттемені орындаған. «Әкімдік бізге құрылысты шұғыл бастау туралы өтініш білдірген кезде, біз бәріміз қолдадық, көбісі несиеге кіріп, қарызға ақша алып, іске кірісті. Жұмысшыларды еңбекақыны күтуге көндірдік. Біз бәріміз қиындыққа тап болған адамдар спорт залдары мен жатақханаларда тұратынын түсіндік. Алғашқы үйлер бойынша төлем жүргізілді және ешкім мұндай проблема туындайды деп күткен жоқ. Менің кәсіпорным «Ash stroy» ЖШС берешек 88,5 млн теңге, шарттың жалпы сомасы 118 млн теңге. Осыған ұқсас проблемалар тағы 13 компанияда бар. Берешектің жалпы сомасы 400 млн теңгеден асады. Біздің көпшілігіміз шарттарға қол қойылуын күтпей жұмысқа кірістік, — дейді «Ash stroy» ЖШС директоры, СҚО кәсіпкерлер палатасы құрылыс сараптамалық кеңесінің төрағасы Әміржан Шәкей.
СҚО әкімдігі құрылыс, сәулет және қала құрылысы басқармасы басшысының орынбасары Серікжан Шитқанов құжаттардың толық пакетін жаңа жылға дейін қорға жібергенін сендірді. Төлем бойынша берешек мәселесі бірінші рет көтеріліп отырған жоқ. Бұған дейін бұл мәселемен мердігерлер облыс әкімінің орынбасарына барды. Онда оларды ақшаның түсетініне сендіріп, құжаттардың толық еместігі туралы бір ауыз сөз айтпаған.
Кәсіпкерлердің құқықтарын қорғау жөніндегі кеңес бұл мәселені бақылауға алды. Енді кәсіпкерлер бір тәулік ішінде жоғалған құжатты жеткізуі тиіс, ал қор өз кезегінде бір апта ішінде қалған қаражатты төлеуге уәде берді.
Ақерке ДӘУРЕНБЕКҚЫЗЫ.
