Облыс аумағында ауа райын болжаушылардың бақылау пункттері қар жамылғысын жиі бақылауға көшті. «Қазгидромет» РМК облыстық филиалының мәліметінше, соңғы мониторинг 15 ақпанда жүргізілген. Қазір облыс бойынша қар жамылғысының орташа биіктігі 9-40 см. шамасында, бұл — облыстың көп бөлігінде нормаға жақын. Уәлиханов және Ғ. Мүсірепов атындағы аудандарда, Шал ақын ауданында қар қалыңдығы нормадан 10-21 см.-ден асады.
Биыл облыс аумағы бойынша қардағы су қоры 18-ден 100 мм.-ге дейін, облыстың көп бөлігінде орташа көпжылдық мәндерге жақын, норма 33-70 мм. Ал өңірдің оңтүстік-шығыс және оңтүстік-батыс бөліктерінде қардың сумен қанығуы нормадан 40-75 пайызға артық.
Биыл өзендер мен көлдерде су мол. Мәселен Сергеевка су қоймасындағы су деңгейі 802см.-ге жеткен, бұл өткен жылғы мәндерден 86 см.-ге артық. Су қоймасы 101 пайызға толған. Петропавл маңындағы Есіл өзенінде су деңгейі 265 см,, бұл 2024 жылдан 22 см.-ге артық.Мұздың қалыңдығы Есіл өзенінің салаларында 16-дан 80 см.-ге дейін, Есіл өзенінде 25-тен 68 см.-ге дейін жетті. Былтыр осы кезде мұздың қалыңдығы салаларында 14-62 см. болса, Есіл өзенінде 34 см.-ден жоғары тіркелген еді.
Алдағы күндері облыс аумағына циклон әсер етеді. Соның салдарынан желдің екпіні 15-20 м/с дейін күшейіп, боран тұрмақ. Ауа температурасы күндіз -3-8 градус аяз, түнде сынап бағанасы -8-13 градусқа дейін төмендейді.
