Сенат төрағасы Мәулен Әшімбаев Жұмысшы мамандықтар жылына арналған парламенттік талқылауда Солтүстік Қазақстан облысындағы демографиялық жағдайға алаңдайтынын білдірді.
— Бұл – салмақты проблема. Бір ғана Солтүстік Қазақстанда халықтың көшіп кетуі тоқтамай тұр. Сәйкесінше тұрғындар саны азайып жатыр. Оның табиғи факторы да. Одан бөлек жастардың кейбір көрші елдерге көшіп кетуі бар. Бірінші оқуға түседі, кейін сол жаққа жұмысқа шақырады. Шығыс Қазақстан, Павлодар облыстарында да осыған ұқсас тенденция бар деп ойлаймын. Көп ел жас мамандарды өзіне тартуға мүдделі. Өз мамандарымызды өзімізде қалдыру негізгі міндет болуы керек, — деді Сенат спикері.
Сондай-ақ оңтүстіктен солтүстікке бағытталған еңбек миграциясын қолдаудың тетіктерін қайта қарау керектігін айтты.
— Оңтүстіктегі артық жұмыс күшін солтүстіктегі еңбек күші тапшы өңірлерге көшіру бағдарламасын қайта қарау керек шығар. Бұған дейінгі бағдарламалар тиімсіз болып шықты. Келгенде адамдар қайта көшіп кетіп жатты немесе соншалық бір қызығушылық болған жоқ. Тіпті белгілі бір жемқорлық мәселелері, қаржыны тиімсіз игеру сәттері болды. Солай болды екен деп ол бағдарламалардан мүлде бас тартуға да болмайды. Қайта қарап, кейбір тұсын қысқартып, жаңа бағдарламаны осыған дейін қателіктерді ескеріп, бәріміз бірге ақылдаса отырып бекіту керек шығар, — деді Мәулен Әшімбаев.
Есімжан НАҚТЫБАЙ.
QYZYLJAR NEWS
