Петропавл қаласында Алғыс айту күні мен Қазақстан халқы Ассамблеясының 30 жылдығына орай «Туған жерім – Қазақстаным» атты форум өтті. Бұл алқалы жиынға облыс әкімі Ғауез Нұрмұхамбетов қатысып, түрлі этнос өкілдерін марапаттады.
Елімізде 30 жыл бұрын нақ осы күні этносаралық қатынастарды үйлестірудің бірегей институты — Қазақстан халқы Ассамблеясы құрылды. Сөйтіп, бір шаңырақ астында 120-дан астам ұлт пен ұлыс бейбітшілік пен келісімде өмір сүріп келеді. Осы уақыт аралығында ассамблея мүшелері талай игі бастамалардың басы-қасында жүріп, ел дамуына үлес қосты. Бұл туралы ҚХА төрағасы, Мемлекет басшысы Қасым-Жомарт Тоқаевтың құттықтауын жеткізген облыс әкімі Ғауез Нұрмұхамбетов жан-жақты сөз етті.Содан кейін облыстық Қазақстан халқы Ассамблеясының төрағасы, өңір жетекшісі еліміздегі бірегей институттың дамуына үлес қосқан солтүстікқазақстандықтарды марапаттады.
Бұл күні жерлестерін Алғыс айту күні және ҚХА-ның 30 жылдығымен құттықтауға облыстың құрметті азаматы Анатолий Башмаков та келді. Ол Қазақстан халқы Ассамблеясы елімізде тұратын барлық этностардың басын қосқан бірегей институт екендігін айтып өтті. Ал облыстық ҚХА төрағасының қоғамдық орынбасары, Ақсақалдар кеңесінің төрағасы Ескендір Елеусізов өткізіліп отырған шараның маңыздылығына тоқталды. Оның айтуынша, аталмыш жиын ортақ мақсат жолында өткенімізді саралап, алдағы бағытымызды айқындауға мүмкіндік береді.
Жиында сөз алған «Ассамблея жастары» республикалық қоғамдық бірлестігінің СҚО бойынша өкілдігінің төрағасы Дариға Смайылова атқарып жатқан игі істері жайлы айтып берді. Жастар ассамблеяның 30 жылдығы қарсаңында «30 қадам – ізгілікке» атты үлкен қайырымдылық шараларды бастаған. Олар осы уақыт аралығында көмекке мұқтаж жандарға қажетті тұрмыстық заттар мен азық-түлік апарып, балалар үйінің тәрбиеленушілеріне сыйлықтар жеткізген. Сондай-ақ «Мен донор» акциясын ұйымдастырып, еріктілер қан тапсырған, мектептер мен кітапханаларға кітаптар сыйлаған.
QYZYLJAR NEWS
