Валентина Волкодав — өңірдегі көзі тірі Ұлы Отан соғысы ардагерлерінің бірі. Өткен жексенбіде облыс әкімі Ғауез Нұрмұхамбетов майдангерді туған күнімен құттықтап, үйіне барды.
Валентина Архиповна 19 жасында майданға аттанып, Белоруссия мен Украина майдандарында көпірлер және өткелдер салу ісімен айналысқан отрядтың құрамында болған. Волга өзенінен Берлинге дейінгі жолды жүріп өткен ол, II дәрежелі ҰОС ордені және бірқатар медальдармен марапатталған. Қарияның кеудесіндегі «Берлинді алғаны үшін», «Варшаваны азат еткені үшін», «Беларуссияны азат еткені үшін» медальдары оның соғыста көрсеткен ерлігін паш етіп тұрғандай.
Соғыстан кейінгі жылдары ардагер Целиноградтағы керамикалық зауытта есепші болып жұмыс істеп, еліміздің дамуына үлес қосқан. 30 жылдан астам уақыттан бері Петропавл қаласында тұрып жатыр.
— Ұлы Жеңісті жақындатуға үлес қосқан сіз сияқты аға буынның еселі еңбегі – қазіргі жас буын үшін баға жетпес өнеге. Сіз майдан даласынан елге аман-есен оралған соң күйреген экономиканы қалпына келтіруге атсалыстыңыз. Бүгінде ұрпақ қызығын көріп отырсыз. Келер күнде сізге қуанышы мен игілігін сыйлай берсін, — деген облыс әкімі ардагерге мықты денсаулық тіледі.
Ұлттық ұлан академиясының әскери оркестрі ардагерге мерекелік көңіл-күй сыйлап, соғыс жылдарындағы әндерді тебірене шырқады. Өз кезегінде Валентина Волкодав облыс әкіміне ризашылығын білдірді.
Гүлфайруз ТӨРЕМҰРАТОВА.
QYZYLJAR NEWS
