Петроопавлда 58 жастағы әйелге ота жасалып, оның өт қабынан тауық жұмыртқасындай болатын тас алынды. Петропавлдағы көпбейінді қалалық жедел медициналық жәрдем ауруханасына сырқат қатты ауырып келген. Ол ішінің жоғарғы бөлігі ауырып, жүрегі айнитынын, аузына ащы дәм келетінін айтқан және жалпы әлсіздікке шағымданған. Айтуынша, бұл симптомдар майлы және қуырылған тағамдар жегеннен кейін пайда болып, бір тәулік бойы басылмаған.
Дәрігерлер тексеру барысында оның өтінде тастардың барлығын анықтады. Тастардың бірінің үлкендігі тауық жұмыртқасындай болған. Дәрігерлер шұғыл операция жасау туралы шешім қабылдады. Ота бір жарым сағатқа созылып, сәтті аяқталды. Өт қабынан бірнеше тас алынып, дерттің асқыну қаупі жойылды. Қазір науқас үйінде, тәуір болып келеді.
Дәрігерлердің айтуынша, өттегі тасты алуды кейінге қалдырмау маңызды. Бұл дерт көпке дейін белгі бермеуі мүмкін, бірақ кез-келген уақытта: жедел холециститке, яғни өт қабының қабынуына, өт жолдарының бітелуіне, сары ауруға, холангит, панкреатитке немесе адам өміріне қауіпті өт қабының перфорациясына әкеледі. «Оң жақ қабырғаның асты ауырса, аузыңызға ащы дәм келсе, әсіресе тамақтан кейін жүрек айныса міндетті түрде дәрігерге көрінген жөн. Уақтылы диагноз қою және емдеу ауыр зардаптың алдын алады», — дейді дәрігерлер
Ақерке ДӘУРЕНБЕКҚЫЗЫ.
