Наурыз мейрамына орай Петропавл қаласында жілік сындырудан алғаш рет ата-аналар мен оқушылар, ұстаздар арасында жарыс өтті. Жарысты Петропавл қаласындағы Назарбаев Зияткерлік мектебі ұйымдастырды. Оған 50 шақты адам қатысып, ептілік пен білектің күшін сынады.
— Жілік сындырудан жарыс өтеді дегеннен кейін келіп қалдық. Керек іс-шара деп ойлаймын. Балаларымыз салт-дәстүрді біліп өсуі қажет. Бүгін қолды ауыртып алмас үшін орамалды қалай орау керек, қалай ұру жайлы, айтып, көрсеттік. Өзіміз де керемет әсер алдық. Сындырмасақ та, қатыстық. Дәстүр ұмыт қалған жоқ, қыста соғым етін асып, той-томалақ өткізгенде жігіттер жағы жілік сындырып, күшін сынап жатады, — дейді оқушының әкесі Асыл Қазбеков.
Ұйымдастырушылардың айтуынша, жілік сындыру — қазақтың көне ойындарының бірі. Оның мәні — тойдан қалған жілік сүйегін қолмен жарып, сындыру. Бұл ойын күш, төзімділік және дұрыс техниканы қажет етеді. Ежелгі уақытта жілік сындыру тек ойын-сауық қана емес, сонымен қатар бозбалалардың күші мен ептілігін көріп, ересек өмірге дайындығын тексеру тәсілі болған.
— Бұрын кішкентай кезімде әкемнің достары келіп осылайша жілік сындырып ойнайтын. Мен де өз күшімді сынап көрмек болдым. Бұл ойында бірінші болып ұрғандарға қиын, ал менің жолым болды, соңына қарай ұрғандықтан тез сынды деп ойлаймын, — дейді мектеп оқушысы Алихан Гусейнов.
Жарыс барысында қатысушылар барлығы 4 жілікті сындырып, мықтыларды анықтады. Мектеп ұжымы бұл іс-шараны дәстүрге айналдыруды жоспарлап отыр.
Ақерке ДӘУРЕНБЕКҚЫЗЫ.
