Он екі мәселе қаралған облыстық мәслихаттың кезекті 23-ші сессиясында төраға Владимир Бубенко өткен 2024 жылды қорытындылады.
Сессияда облыстық энергетика және тұрғын үй-коммуналдық шаруашылығы басқармасы басшысының орынбасары Ермек Тушанов өңірдегі тұрғын үй-коммуналдық инфрақұрылымының дамуы туралы айтып, халықтың өмір сүру сапасын жақсартуға бағытталған негізгі жобалар мен бастамаларды атап өтті. Ал экономика басқармасының басшысы Қуанышбек Қалижанов мемлекеттік-жекешелік әріптестік шеңберінде жергілікті жобалардың іске асырылу барысы туралы баяндады.
Сессияда мәслихаттың бюджеттік ұйымдар қызметкерлерінің жалақыларына ынталандырушы үстемеақылар белгілеуге, тұрғын үй сертификаттарын алушылардың санаттарын айқындауға, округтік сайлау комиссияларының мүшелерін сайлауға қатысты бірнеше шешіміне өзгерістер енгізілді. Облыс әкімдігі жанындағы құқық бұзушылықтардың алдын алу жөніндегі, сыбайлас жемқорлыққа және терроризмге қарсы күрес жөніндегі ведомствоаралық комиссиялардың құрамына өзгерістер енді. Облыстық тексеру комиссиясы мүшесінің тәртіптік жауапкершілігі де қаралды.
Бұдан басқа «Ақ жол демократиялық партиясының» партиялық тізімі бойынша мәслихат құрамына жаңа депутат Жанат Жүсіпов тіркелді, ол бұдан былай облыстық мәслихаттың депутаттық өкілеттіктері, азаматтардың құқықтары, қоғамдық ұйымдармен және бұқаралық ақпарат құралдарымен байланыс мәселелері жөніндегі тұрақты комиссияда жұмыс істейтін болады. Аталған комиссияның төрағасы болып депутат Юлия Пронина сайланды.
Сессияда сөз болған барлық мәселелер тұрақты комиссиялардың алдын ала отырысында талқыланған болатын.
Қайрат САДЫҚОВ,
облыстық мәслихаттың баспасөз хатшысы.
