Сирек кездесетін жүрек ауруына шалдыққан петропавлдық баланың дәрісіне жергілікті бюджеттен ақша бөлінбек. Бұл туралы облыс әкімінің орынбасары Рүстем Құрманов көмек сұрап келген баланың анасына айтты.
Мадиан Чугунбаева облыс әкімі орынбасарының қабылдауына келген. Оның баласы туа біткен жүрек ауруына шалдыққан. Үнемі дәрі қабылдауы қажет. Ота жасауға да келмейді. Тек жүрегін ауыстырып қана емдеуге болады екен. Бірақ оның өзіне науқастың денсаулығы шыдас бермеуі мүмкін.
– Біз жас отбасымыз. Осы күнге дейін ешкімнен көмек сұраған емеспіз. Өз күшімізбен Түркиядан дәріні сатып алып жүрдік. Ол дәрі біздің елде тіркелмеген. Облыстық денсаулық сақтау басқармасына дәрі беруді өтініп, бірнеше рет хат жаздым. Алайда олар біз ішетін дәрі тегін берілетін медикаменттердің тізімінде жоқ екенін айтты. Сатып алынған соңғы қорапты ішіп бастадық. Жазда тағы медициналық тексерістен өтеміз. Одан кейін дәрінің дозасы да өзгеруі мүмкін. Осы мәселені шешіп берсеңіздер деймін, – дейді қала тұрғыны Мадиан Чугунбаева.
Оның айтуынша, баланың қозғалысы ширақ, қатарластары секілді балабақшаға да барады. Бірақ, көп жүрсе ентігіп, жүрек қағысы жиілеп кетеді екен. Себебі оның жүрегі үш камералы.
– Сіздің жағдайыңызды білеміз. Хатыңызды да алдым. Шынымен де, дәрі тегін берілмейді. Қымбат дәрілердің қатарына жатады. Оны шешудің бір жолы – жергілікті бюджеттен ақша бөлу. Осы мәселені облыстық мәслихат отырысына шығарып, ақша бөлуді талап ету керек, – деп өз ұсынысын айтты облыстық денсаулық сақтау басқармасының басшысы Қаныш Бижанов.
Бұл ұсынысты Рүстем Құрманов құп көрді. Себебі облыс әкімінің орынбасары сирек ауруға шалдыққан балаларға жан-жақты қолдау көрсету қажет екенін айтты.
Гүлнәр САЙЛАУҚЫЗЫ,
облыстық денсаулық сақтау
басқармасының баспасөз хатшысы.
