Облысымызда биыл алимент бойынша қордаланған қарызы бар үш борышкер қылмыстық жауапкершілікке тартылды. Облыс прокуратурасының мәліметінше, қадағалау органының үйлестіруімен Қазақстан Республикасы Қылмыстық кодексінің 139-бабы бойынша тағы екі адамның ісі сотқа жеткізілді, олардың ісі қаралып жатыр.
Мәселен, кәмелетке толмағандарға арналған мамандандырылған ауданаралық соттың үкімімен кәмелетке толмаған баланы асырау туралы алименттік міндеттемені 6 айдан астам орындамағаны үшін ер адамның 1 жылға бас бостандығы шектелді. Оның берешегі 4,9 млн. теңгеге жеткен.
Алимент төлемдерін өндіріп алу бойынша сот актілерін орындамағаны үшін Қазақстан Республикасының «Әкімшілік құқық бұзушылық туралы» Кодексінің 669-бабына сәйкес 23 борышкер әкімшілік жауапкершілікке тартылды. Айыртау аудандық сотының қаулысымен алиментші 5 күн мерзімге қамауға алынды.
Жыл басынан бері құқық бұзушылықтарды жою мақсатында алимент өндіру мәселесі бойынша құқық қорғау органдарына 13 ұсыныс жіберіліп, нәтижесінде 10 сот орындаушысы түрлі тәртіптік жауапкершілікке тартылды. Жалпы, прокурорлардың араласуымен 13 млн. теңге алимент бойынша қарыз өндірілді. Қазіргі уақытта облыста алимент төлеушілердің жалпы қарызы 240 млн. теңге шамасында.
Ақерке ДӘУРЕНБЕКҚЫЗЫ.
