Петропавлда «Домбыра-дастан» атты республикалық күй тартыс байқауы өтті. Сайысқа еліміздің алты облысынан келген 24 өнерпаз қатысты. Дәстүрлі дода білім беру саласының үздігі, аталған жобаның негізін қалаушы Серікбай Здуалиевті еске алуға арналды.
– Байқау оқушылар мен студенттер арасында өтеді. Бас жүлдеге ие болған өнерпаз ақшалай сыйлықпен марапатталады. Қатысушылардың өнерін бағалау барысында орындаушылық шеберлікке, техникаға, сахна мәдениетіне, дыбыстың тазалығына баса назар аударамыз, – деді «Домбыра-дастан» күй тартыс жобасының жетекшісі Тұңғыш Бекенайұлы.
Сайыстың өзіндік ерекшелігі бар. Сахнаға шыққан екі домбырашы 10 күйді кезектесіп ойнайды. Ең қызығы, күйшілердің бірі туындының кез келген жерінде тоқтайды. Мұны қарсылас бақылап отыруы қажет. Ол шығарманы сол жерден жалғастырып алып кетуі керек.
«Құлақтан кіріп, бойды алар, әсем ән мен тәтті күй» деп бекерден-бекер айтылмаған. Байқау барысында шертілген әр туынды бойды тітіркендірді, рухты жаныды. Өз кезегінде көрермен аламанға түскен жастарға қошеметпен, қиқумен шабыт берді.
Мектепаралық сайыстың қорытындысы бойынша бас жүлдені мүсіреповтік Талғат Ермек иеленді. Ал студенттер арасындағы бәсекеде астаналық Ералы Таупихтің мерейі үстем болды. Күй тартыс – өткеніміз бен өнеріміз ұлықталатын дода. Байқаудың тәрбиелік тұрғыда да маңызы зор. Болашақта мұндай шаралар атақты тұлғалар өмірге келген теріскейде жиі ұйымдастырылмақ.
QYZYLJAR NEWS
