Өткен демалыста спортсүйер қауымның назары Қызылжар ауданындағы «Құлагер» ипподромына ауды. Бәйгеден ел чемпионатының іріктеу кезеңіне келгендер арасында қатысушы да, жанкүйерлер де көп. Сайысқа сайланған сәйгүліктер құнан бәйге, топ бәйге мен жорға жарыста сынға түсті. Бәйгенің жалпы жүлде қоры 22 млн. теңгеден асады.
– Бұған дейін аламанның үш кезеңі өтті. Үш кезеңнен де сүрінбей өткен сәйгүліктер осы сында тартысқа түсті. Елдің ат спортына деген ықыласы ерекше. Алда әлі де болатын жарыстар аз емес. Сәйгүліктеріміз сүрінбей, спортшылардың жұлдызы жоғарылай берсін, – дейді бәйге федерациясының вице президенті Мұрат Нөсербаев.
Жарысты құнан бәйгеге келген шабандоздар бастады. Жиырмадан аса тұлпар 8 шақырым жерге шалдықпай шауып, жанкүйерлердің делебесін қоздырды. Ауыздықпен алысып жүрген сәйгүліктер белгі беріле сала шаң шығарып шаба жөнелді. Құнан бәйгеде «Қазына», «Талас» лақап атымен белгілі аттар Солтүстік Қазақстан облысының атынан шапты. Бәйгенің соңында «Ақкөз» атты тұлпар өз тобынан қара үзіп, мәре сызығынан бірінші болып өтті.
– Бәйге тамаша өтті. Соңғы айналымға дейін топтың ішінде болып, ең аяғында қамшыны бастым. Чемпионатта құнан бәйгеден бөлек топ бәйгеде де өнер көрсеттім, – дейді «Ақкөздің» шабандозы Арнат Мұратхан.
Құнан бәйгеде Әліби Айтпек тізгіндеген «Акула» сәйгүлігі екінші келсе, үшінші орынның жүлдесі «Қарлығаш» тұлпарымен мәреге жеткен Нұрдәулет Аманерге берілді.
Келесі 14 шақырымдық топ бәйгеде 22 шабандоз өнер көрсетті. Бұл жолы жеңісті Айшуақ атымен Мерей Ғарипуллин еншіледі.
– Осындай жарыстың өңірімізде өтіп жатқанына қуаныштымыз. Мемлекет ұлттық спорт түрлеріне ерекше мән беруде. Бүгінгі жарыстың деңгейі жоғары. Ұлттық дәстүрді келешек ұрпаққа жеткізудің бір жолы – осындай шараларды жиі ұйымдастыру. Болашақта ат спорты қазақты әлемге танытады деп сенеміз. Іріктеуді де әр аумақта өткізу шабандоздар мен сәйгүліктерге тың серпін береді. Облысымыздағы ипподромның да өзіндік ерекшеліктері бар, – дейді облыстық дене шынықтыру және спорт басқармасының басшысы Әділхан Сағындықов. Солтүстіқазақстандық шабандоздар жорға жарысында жарқырай көрінді. 15 қатысушының арасынан екі қызылжарлық жүлдеге ие болды. Үшінші орынды «Триумф» атты атымен Андрей Ровдо иеленді. Ал Әлия Тоқтасынова тізгіндеген «Граф Лок» мәреге екінші болып жетті. Екі аттың да иесі — Аягөз Бекенова.
