ОБЛЫС ӘКІМІ ҒАУЕЗ НҰРМҰХАМБЕТОВ АЗАМАТТАРДЫ ҚАБЫЛДАП, ӨҢІР ТҰРҒЫНДАРЫНЫҢ ТҰРМЫСТЫҚ ЖАҒДАЙЫ МЕН ҚАЛА ИНФРАҚҰРЫЛЫМЫН ДАМЫТУҒА ҚАТЫСТЫ ҰСЫНЫСТАРЫН ТЫҢДАДЫ. ҚАБЫЛДАУҒА КЕЛГЕНДЕР БАЗАР МАҢЫНДАҒЫ «ҚЫЗЫЛ СЫЗЫҚТАРДЫҢ» БҰЗЫЛУЫ, САНИТАРЛЫҚ НОРМАЛАРДЫҢ САҚТАЛМАУЫ, ТРОТУАРЛАР МЕН ЖАЯУ ЖҮРГІНШІЛЕР ӨТКЕЛДЕРІН ОРНАТУ, ҚАҢҒЫБАС ИТТЕРМЕН КҮРЕС, ӘУЕ РЕЙСТЕРІН КӨБЕЙТУ ЖӘНЕ АУЛАЛАРДЫ АБАТТАНДЫРУ СЫНДЫ МӘСЕЛЕЛЕРДІ КӨТЕРДІ.
Өңір басшысы әр өтінішке жеке тоқталып, жауапты мемлекеттік органдарға нақты тапсырмалар берді. Ол тұрғындар көтерген түйткілдерді шешу жергілікті атқарушы орган жұмысының негізгі басымдығы екенін атап өтті.
Қабылдауға келген қала тұрғыны Әлім Шүкенов вокзал маңында автотұрақтың жетіспеуі, қарттар үйіндегі орын тапшылығы және қалалық саябақтардың қазіргі жай-күйіне алаңдаушылық білдірді. Ол әсіресе «Дария» базары орналасқан аумақтағы ретсіз құрылыстар мен санитарлық ахуалға назар аударды.
Базар «қызыл сызық» үстіне бей-берекет салынып жатыр. Көлік қозғалысы қиындап, кептеліс жиілеген. Біржақты қозғалыс енгізілгенімен, автотұрақтар жоқ, жасыл аймақты ұтымды пайдалану жағы ескерілмеген. Сонымен қатар бірқатар сауда нысандары тікелей жылу құбырларының үстіне салынған, бұл апаттық жағдайда қауіп туғызуы мүмкін.
Облыс әкімі бұл мәселені назарға алып, аталмыш аумақтың санитарлық жағдайын тексеруді, сонымен қатар қосымша тұрақ орындарын ұйымдастыру мүмкіндігін қарастыруды тиісті мекемелерге тапсырды. Сонымен қатар ол жақын маңдағы басқа базарларды, оның ішінде бұған дейін өрт шыққан «Рахат» сауда үйін тексеру қажеттігін де атап өтті.
Тағы бір тұрғын – Вадим Саликов аулаларды абаттандыру мәселесін көтерді. Оның айтуынша, жол жамылғысының нашарлығы салдарынан аула ішінде ұсақ жол-көлік оқиғалары жиілеп кеткен. Тұрғынның бұл мәселе бойынша фото-дәлелдері де бар. Сонымен қатар спорт алаңындағы қоршаудың әлсіз екені айтылып, оны жаңарту туралы өтініш білдірді.
Өңір басшысы аулаларға қатысты сараптама жасап, асфальт салу мен қоршау сапасын ерекше назарда ұстау қажет екенін айтты. Ол тұрғындардан түскен шағымдардың ескерілетінін және барлық жұмыстардың нақты орындалуын қадағалау қажеттігін атап өтті.
Қабылдау қорытындысы бойынша облыс әкімі барлық айтылған ұсыныстар мен шағымдар бойынша тиісті шаралар, нақты шешімдер қабылдануы керектігін қадап айтты. Халықпен кері байланыс орнатып, олардың мұң-мұқтажына құлақ асу – жергілікті билік жұмысының ажырамас бөлігі екендігін жеткізді.
