Облыстық әкімдік отырысында Санитарлық-эпидемиологиялық бақылау департаментінің басшысы Әсет Жұматаев мониторингтік топтың атқарған жұмыстары жайлы баяндады, деп хабарлайды Qyzyljarnews.kz тілшісі.
Ақпан айында облыс аумағында 61 рейд ұйымдастырылып, 364 нысан тексерілді.
-Мониторинг кезінде Тайынша ауданындағы 15 нысанда ереже бұзу фактілері тіркелді. Ал қалған аудандарда олқылықтар байқалған жоқ. Дегенмен, Ақжар, Ғабит Мүсірепов пен Шал ақын аудандары мен Петропавл қаласында рейдтік шаралар әзірге өткізілген жоқ. Ал Аққайың ауданында тек 2 тексеру жұмыстары жүргізілді. Уәлихановта 5 рейд ұйымдастырылды,-деді Әсет Жұматаев.
Әсет Жұматаев мониторингтік топтар карантин ережелерін бақылауға арналған жұмыстарын күшейте түсу керектігін атап өтті.
Сонымен қатар, маман облыста «Ashyq» жүйесі ережелерін бұзудың 48 фактісі анықталғанына назар аударды. Әкімшілік жауапкершілікке тартылған жандар «қызыл» статусты бола тұра, нысандарға кірмекші болған. Бұл қылықтары үшін азаматтарға 2,3 миллион теңгеге дейін айыппұл салынды.
