Солтүстік Қазақстан облысының 41 жастағы тұрғыны Ақмола өңірінің 17 тұрғынын алдап, қаражаттарын қалтасына басқан, деп хабарлайды Qyzyljarnews.kz тілшісі.
Ақпанның 10-ы күні Көкшетау қаласының полиция басқармасына 48 жастағы тұрғын шағымданған. Жәбірленушінің айтуынша, осыдан 2 жыл бұрын тұтыну кооперативінің басшысы «ГАЗель» автокөлігін сатып алуға жәрдемдесемін деп, 2 млн 796 мың теңгесін алдап алған.
Кейін анықталғандай, 41 жастағы күдікті Көкшетауда «Тиімді тұрғын үй» және «Mansur auto» несие-тұтыну кооперативін ұйымдастырыпты. Клиенттерін жылжымайтын, жылжымалы мүлікті сатып алуға пайызсыз қарыз алуға көмектесемін деп сендірген. Осыдан кейін салымшылар сұраған соманы беріп отырған.
Аталған факті бойынша полиция басқармасының тергеу бөлімі Қылмыстық кодекстің 190-бабының 3-бөлігі бойынша алаяқтық жасағаны үшін сотқа дейінгі тергеуді бастады. Ақмола облысының 17 тұрғыны алаяқтың құрбаны болғаны анықталды. Шығын көлемі анықталып жатыр.
