Елімізде бірінші наурыздан бастап «Жануарларға жауапкершілікпен қарау туралы» заң қолданысқа енді, деп хабарлайды Qyzyljarnews.kz тілшісі.
Жаңа заңға сәйкес, төрт аяқтылардың иелері жануарлардың өмірі мен денсаулығы үшін жауап береді. Басты мақсат – адамдардың жануарларға деген қамқорлық сезімін оятып, тіршілік иелерінің қауіпсіздігін қамтамасыз ету.
Құжат негізінде иттерді өзара төбелестіруге, жануарларға ветеринарлық оталарды наркозсыз жасауға, сондай-ақ, оларға қатыгездік танытуға тыйым салынады.
Жануарлардың денсаулығына зиян келтірген адамдарға қолданылатын жаза түрі де күшейтілді.
Қылмыстық кодекстің 316-бабында жануарға жауыздық жасап, тіпті мертігуге дейін жеткізген азаматтарға 120 АЕК-ке дейін (367 560 теңге) айыппұл салынуы мүмкін. Немесе заң бұзушы 120 сағатқа дейінгі мерзімге қоғамдық жұмыстарға тартылып, не болмаса 30 тәулікке дейінгі мерзімге қамауға алынады.
Егер де жануар адамның кесірінен өліп қалса, сол кісіге 200 АЕК-ке дейін (612 600 теңге) айыппұл салынып немесе түзеу жұмыстарына, болмаса 200 сағатқа дейінгі мерзімге қоғамдық жұмыстарға тартылып, бір жылға дейінгі мерзімге белгілі бір лауазымдарды атқару немесе белгілі бір қызметпен айналысу құқығынан айыра отырып және онсыз 50 тәулікке дейінгі мерзімге қамалады.
Қатыгездік қайталанса, айыппұлдар төрт есе артады.
