Петропавлдағы Назарбаев зияткерлік мектебінің оқушысы Нұрсұлтан Есқалиев Түркияда ашихара-каратеден өткен әлем чемпионатында күміс медаль жеңіп алды, деп хабарлайды Qyzyljarnews.kz тілшісі.
Дүбірлі додаға әлемнің 20 елінен жиналған каратешілер қатысты. Қазақстанның намысын эншин карате федерациясының 60 спортшысы қорғаған. Нәтижесінде, олар еліміздің қоржынын 16 алтын және осынша күміс, сондай-ақ 7 қола медальмен толықтырды.
Петропавлдық Нұрсұлтан Есқалиев болса, 60 келі салмақ дәрежесінде, 16-17 жас аралығында өнер көрсеткен.
— Сайыс барысында кейбір жерлерде қателіктер жіберіп, ережені бұзған кезім де болғаны рас. Сонда да, көрсеткен нәтижем өзімнің көңілімнен шықты. Бастысы үлкен тәжірибе жинадым, — дейді 10 «D» сыныбының оқушысы Нұрсұлтан Есқалиев.
Мектеп оқушысы эншин каратеден Қазақстан чемпионы атанған. Осы жолы әлем біріншілігінің күміс жүлдегері атағы қосылды.
