Үстіміздегі жылы облыс орталығындағы көшелерге тағы 188 бейнекамера жүйесі қойылады, деп хабарлайды Qyzyljarnews.kz тілшісі.
Оның 50-і қазірдің өзінде саябақтарға орнатылды. Бейнекамералар аялдамалардан бөлек стадиондарға, ескерткіштердің маңына, аулаларға, саяжай қоғамдарына сондай-ақ, қоқыс төгетін алаңдарға да орнатылады.
— Былғары зауыты, Жұмысшы кенті, Қизатов көшесі бойынша Борки кентінен Солнечный кентіне және Потанин көшесіндегі соңғы аялдамаларға датчигі бар бейнекамералар қойылады. Автобус күтетін орындардың шынысын біреу-міреу сындырған жағдайда, бірден жазып алады. Бейнекамералардың барлығы Ikomek-109 ахуалдық орталығына және Солтүстік Қазақстан облыстық полициясы департаментінің жедел басқару орталығына қосылады, — деді баспасөз қызметі.
