Петропавлда 21 жасар келіншекке синтетикалық есірткілерді сатты деген айып тағылды. Күдіктіге қатысты қылмыстық іс сотқа жіберілді, деп хабарлайды Qyzyljarnews.kz тілшісі.
Жас келіншектен психотроптық зат салынған, салмағы 4,81 грамм болатын 8 полимерлік түйіншек тәркіленді. Аталған факті сотқа дейінгі тергеп-тексерулердің бірыңғай тізіліміне енгізілді. Күдіктінің синтетикалық есірткілерді сататын интернет-дүкенге қатысы бары анықталдып, қамауға алынды.
-Нашақорлық пен есірткі бизнесі жастардың тағдырына балта шабады. Ұсталған тұрғын 2018 жылдан наркологиялық есепте тұр. Осыған дейін ұрлық жасағаны үшін бірнеше рет қылмыстық жауапкершілікке тартылып, істі болған. Оған қоса 2019 жылы ата-ана құқығынан айырылды. Қазақстан Республикасы Қылмыстық кодексінің 297-бабы 3-бөлігі 15 жылға дейін бас бостандығынан айыруды көздейді,-деді СҚО Полиция департаменті Есірткі қылмысына қарсы іс-қимыл басқармасының бастығы Жандос Басыбаев.
Жыл басынан бері полицейлер есірткі сатудың 14 фактісін тіркеді. Заңсыз айналымнан 16 килограмнан астам түрлі есірткі заты алынды.
Istock иллюстрациялық фотосы
