Шал ақын ауданында патрульдік полиция қызметкерлері тоқтатқан көліктің жүргізушісі мас болған. Тексеру барысында оның іздеуде жүрген қылмыскер екені анықталды, деп хабарлайды Qyzyljarnews.kz тілшісі.
Қызылжар ауданының 27 жастағы тұрғыны таксиге жолаушы ретінде отырған. Жол үстінде жүргізушінің тілін тауып, рөлге ие болған. Өзінің автомобиль жүргізу құқығы да жоқ болып шықты. Аудандық сот шешімімен Қазақстан Республикасының әкімшілік құқық бұзушылық туралы кодексінің 608-бабы бойынша: біреуіне көлікті мас күйде жүргізгені үшін 20 тәулікке қамауға алу, екіншісіне рөлге мас адамды отырғызғаны үшін 15 тәулікке қамауға алу түріндегі жаза тағайындалды.
-Аталған азамат шартты-мерзімінен бұрын босату режімін ұдайы бұзғаны үшін пробация қызметі желісі бойынша іздеуде жүр. Бұдан бөлек, 3 алаяқтық бойынша полиция қызметкерлерінің күдігіне іліккен. Тергеу оның басқа да қылмыстарға қатысын тексереді,-деді аудандық полиция бөлімінің бастығы полиция подполковнигі Руслан Мұхамбетжанов.
Жалпы жыл басынан солтүстікқазақстандық полицейлер 14 қылмыскерлерді іздеп тапты.
Фото: ашық дереккөздерден
