Көктем келісімен Петропавлдағы қоқыс контейнерлері тұрмыстық қалдықтардың үйіндісіне айналады. Күн жылынысымен тұрғындар үйлері мен саяжай аумақтарын тазалауға кірісті. Қоқысты шығармай, жақын маңдағы контейнерлерге тастай салады,-деп хабарлайды Qyzyljarnews.kz тілшісі.
— Петропавл тұрғындары мен қаладағы ұйымдар аулалар мен көшелерді тазалауға кірісті. Тұрмыстық қалдықтарға арналған контейнерлер жиһаз қалдықтары мен бұтақтарға толды. Осыған байланысты арнайы машиналар қоқысты уақытында шығарып үлгермей жатыр. Қызметкерлер тәулігіне 12 сағаттан жұмыс істеуге мәжбүр. Сонымен қатар, қалада арнайы техникамен бірге басқа да көліктер жұмыс істейді. Естеріңізге сала кетейік, сенбіліктен кейін аулаларда пайда болған қоқыстарды шығару сенбілікті өткізген ұйымдар мен мүлік иелері бірлестігі есебінен жүзеге асырылады, — дейді Петропавл қалалық әкімдігі жанындағы ТҮКШ бөліміндегілер.
Фото: ашық дереккөздерден