Солтүстікқазақстандық полицейлер мотоцикл мен скутер жүргізушілеріне жолда жүру ережелерін сақтау қажеттігін ескертті, деп хабарлайды Qyzyljarnews.kz тілшісі.
Петропавлдық мотоцикл жүргізушілері, әсіресе түнде тұрғындардың мазасын алатыны жасырын емес. Полиция департаменті баспасөз қызметінің мәліметінше, жұмыс күндері сағат 22.00-ден кейін, ал демалыс және мереке күндері сағат 23.00-ден кейін тыныштықты бұзуға болмайды. Заңды бұзғандарға 5 АЕК айыппұл салынады.
-Мотоциклшілер белгіленген жылдамдықты асырып, маневр жасау қағидаларын жиі бұзады. Кез келген ереже бұзу жол-көлік апатына әкеліп соғуы мүмкін. Екі дөңгелекті көліктің жүргізушілері маневр жасағанда, бұрылғанда, басқа жолаққа ауысқанда жол қозғалысының басқа қатысушыларына көрінетіндей белгі беруі тиіс. Ал ереже бұзғандарға айыппұл қарастырылған. Жүргізуші де, жолаушысы да шлем киюі тиіс,-дейді СҚО жергілікті полиция қызметі басқармасының бастығы Айдын Байматов.
Тәртіп сақшылары велосипедке 14 жастан бастап қана мінуге болатынын айтты. Қозғалтқыш көлемі 50 текше метрден көп емес скутерді және оларға теңестірілген электрсамокаттарды 16 жастан басқаруға болады. Жүргізуші куәлігі болуы міндетті емес. Десе де, жас жүргізушілер жолда жүру ережелерін білуі тиіс.
Фото: ашық дереккөздерден
