Былтыр 375 солтүстікқазақстандық 18 жасқа дейінгі балаға қойылатын профилактикалық екпеден бас тартты. Мамандар қарсы болған адамдарға вакцинацияның маңыздылығын түсіндірді. Нәтижесінде, 109 тұрғын препаратты қойғызды, деп хабарлайды Qyzyljarnews.kz тілшісі.
Облыстық санитарлық- эпидемиологиялық қадағалау департаментінің басшысы Әсет Жұматаевтың айтуынша, облыста 1 жасқа толмаған 5700 бала гепатитке қарсы вакцинация алуы керек. Препаратқа қарсы көрсетілім болғандықтан, 447-сіне екпе қойылмапты. Сонымен қатар,103-інің ата-анасы екпе алуға үзілді-кесілді қарсы болған. 463 бала полиомиелитке қарсы екпе алмаған, оның ішінде 121-і ата-анасының бас тартуына байланысты.
Пневмококк инфекциясына қарсы 670 бала вакцина алған жоқ. Сегіз адам профилактикалық егуден бас тартты, қалған жағдайларда сәбилерге екпе алуға медициналық қарсы көрсетілім тағайындалыпты.
-Былтыр Ғабит Мүсірепов ауданындағы жағдайды қоспағанда, вакцинаға байланысты инфекциялар тіркелмеді. Ақжар ауданында 1 адам сібір жарасымен сырқаттанды. Туберкулезбен ауыру деңгейі 15% — ға төмендеді. Жаңа 183 жағдай анықталып отыр. Жалпы, жұқпалы аурулар мен аса қауіпті инфекциялардың көпшілігі бойынша эпидемиологиялық жағдай тұрақты, — деді облыстың бас санитар дәрігері Әсет Жұматаев.
