Солтүстік Қазақстан облысында ауыл тұрғыны зираттағы марқұмның денесін өз бетінше басқа жерге көшірген. Елді елең еткізген оқиғадан кейін қабірге эксгумация жүргізілді, деп хабарлайды Qyzyljarnews.kz тілшісі.
-Сотқа дейінгі тергеу кезінде Ғабит Мүсірепов ауданының полицейлері мәйітке эксгумация жүргізді. Тергеу барысында мәйіттің басқа жерге жерленгені анықталды. Былтыр қыркүйекте жерленген ер адамның денесі қабірден алты метр жерден табылды, — деп хабарлады облыстық полиция департаментінің баспасөз қызметі.
Қазір Қылмыстық кодекстің 314-бабы («қайтыс болғандардың денесін және оларды жерлеу орындарын қорлау») бойынша сотқа дейінгі тергеу жүргізілуде.
Заңнамаға сәйкес қайтыс болғандардың денелерін және оларды жерлеу орындарын қорлағандарға үш мың айлық есептік көрсеткішке дейінгі мөлшерде айыппұл салынуы мүмкін. Немесе осыншама мөлшерде түзеу жұмыстарына, болмаса 800 сағатқа дейінгі мерзімге қоғамдық жұмыстарға тартылуы, немесе 3 жылға дейінгі мерзімге бас бостандығын айырылуы ықтимал.
Фото: Sputnik.kz
