Солтүстікқазақстандық жас каратэшілер Қостанай облысының ашық біріншілігінде жалпыкомандалық есепте бірінші орынға ие болды. Кекушинкай-каратэден өткен турнирге еліміздің 10 өңірінен мыңға жуық спортшы қатысты, деп хабарлайды Qyzyljarnews.kz тілшісі.
Додада 6 мен 17 жас аралығындағы спортшылар өзара бақ сынады. Өңір намысын 130 каратэші қорғап, қоржынға 21 алтын, 12 күміс және 26 қола медаль түсті. Осылайша солтүстікқазақстандық спортшылар жалпыкомандалық есепте алға шықты. Ал екінші орынға Батыс Қазақстан облысы, үшінші сатыға Ақтөбе облысының спортшылары тұрақтады.
-Жыл сайын Қостанай қаласындағы ашық біріншілікке барамыз. Биыл команда сапында аталмыш турнирге алғаш рет қатысқандар да болды. Каратэшілеріміз кумитэ сынында жүзден жүйрік, мыңнан тұлпар атанды, – дейді «Бүкілқазақстандық кекушинкай каратэ ұйымы» республикалық қоғамдық бірлестігі облыстық филиалының жетекшісі Владимир Витченко.
