Бүгін Қазақстандағы мұсылмандар үшін ерекше, қасиетті күн. Себебі, 27-сінен 28-іне қараған түні мың айдан да қайырлы – Қадір түні, деп хабарлайды Qyzyljarnews.kz тілшісі, ҚМДБ-ға сілтеме жасап.
Дәл осы Қадір түнінде қасиетті кітабымыз-Құран түскен. Бұл түнді барша мұсылмандар таң атқанға дейін құлшылық-ғибадат жасаумен өткізеді.
Алла Тағала Құранда: «Біз шынында, Құранды Қадір түнінде түсірдік. Қадір түнінің не екенін білесің бе? Қадір түні (қасиет және сауап жағынан) мың айдан да қайырлы. Сол түнде періштілер және Жәбірейіл Алланың әмірімен (жер бетіне Алла тағдыр еткен) барлық істерді атқару үшін түседі. Сол бір түн, ағарып таң атқанға дейін амандық-тыныштық түні болады» («Қадір» сүресі, 1-5-аяттар) деп баяндайды.
-Қасиетті Қадір кеші мүбәрак болсын! Алла Тағала ұстаған оразаларыңызды, жасаған құлшылық-ғибадаттарыңызды қабыл еткей. Алла Тағала баршамыздың қате-кемшілігімізді кешіріп, өз мейіріміне бөлегей. Раббымыз Қадір кешінде шынайы иманмен жасаған дұғаларымызды, намаздарымызды, берген садақаларымызды, оқыған Құранымызды қабыл етіп, сауабын еселеп жазғай,-деді Қазақстан мұсылмандары діни басқармасының төрағасы, Бас мүфти Наурызбай қажы Тағанұлы.
