«Алтын белгіден» үміткер түлек ұлттық бірыңғай тестілеуде нашар нәтиже көрсетсе, ол білім алған мектеп басшылығы жұмыстан шығарылуы мүмкін. Бұл туралы бүгін Білім және ғылым министрі Асхат Аймағамбетов мәлімдеді, деп хабарлайды Qyzljarnews.kz тілшісі.
Министрдің айтуынша, биыл «Алтын белгіден» үміткер оқушылардың ҰБТ тапсыру нәтижесіне талдау жасалмақ. Бұл іске ұлттық тестілеу орталығы жауапты.
-Егер «Алтын белгіден» үмітті талапкер ҰБТ-дан төмен балл алып, шекті балды жинай алмаса, онда мектеп басшылығын жауапкершілікке тартамыз. «Алтын белгіден» үміткерлердің ҰБТ-ны тиісті деңгейде тапсыруы мен академиялық адалдық приципі біздің бақылауымызда», — деді Асхат Аймағамбетов.
Айта кетсек, биыл ҰБТ-да ерекше қажеттілігі бар балаларға қосымша уақыт берілетін болды.
