Көпсалалы аурухананы 2,5 жылда тұрғызып, 2022 жылдың аяғында тапсыру жоспарланған болатын. Бірақ жұмыстар белгісіз мерзімге «тоқтатылды», деп хабарлайды Qyzyljarnews.kz тілшісі.
СҚО денсаулық сақтау басқармасы бұл жобаның жекеменшіктің қаржысына тұрғызылып жатқанын, оған бюджеттен ақша бөлінбегенін хабарлады.
— Жобаны мемлекеттік – жекеменшік әріптестік бағдарламасы аясында жеке компанияның бастамасымен салу жоспарланған. Қолданыстағы заңнамаға сәйкес енді жекеменшік компания Денсаулық сақтау министрлігіне техникалық-экономикалық негіздемені және конкурстық құжаттаманы тапсыруы қажет, — деп түсіндірді басқарманың баспасөз қызметі.
Естеріңізге сала кетейік, аурухана құрылысы 2019 жылдың соңында басталған. Іргетасын қалауға Қазақстанның сол кездегі Премьер-Министрі Асқар Мамин қатысқан еді. Жобаны «IDS Group» түрік компаниясы жүзеге асырады.
Фото: Qyzyljarnews.kz / Талғат Тәнібаев
