«ҚазАвтоЖол «ҰК » АҚ қызметкерлері үй жануарларының қатысуымен болатын жол-көлік оқиғаларының алдын алу мақсатында мал өткелдерін салу, жолға шығып кетпеуі үшін торлы қоршаулар орнатуда, деп хабарлайды Qyzyljarnews.kz тілшісі.
Қазіргі уақытта республикалық трассаларда 280-нен астам мал өткелі және 850 км-ден астам торлы қоршау бар. Сонымен қатар, республикалық маңызы бар жолдардың 45 шақырымына торлы қоршаудың аналогы болып табылатын «электр-бақташы» орнатылды. Ал Биыл «Ақтау-Жетібай-Жаңаөзен» тас жолының 126 шақырымында «электр-бақташы» үлгісіндегі құрылғылар орнату жоспарланып отыр. 12 вольтты бұл қондырғы жануарларға қауіп төндірмейді.
Сондай-ақ кешенді бағдарлама аясында республикалық трассаларда 10 мың жол белгілері орнатылып, ауыстырылады. Оның ішінде «Мал өтетін жер» және «Жабайы жануарлар» жол белгілері де бар. Бұдан басқа, республикалық маңызы бар 10 мың шақырымнан астам жолда жол таңбалары жаңартылды. Ал жыл соңына дейін тағы 20 мың шақырым жолда таңбаларды жаңарту жоспарлануда.
