СҚО-да майлылығы 2,5% айранға шекті рұқсат етілген бөлшек сауда бағасын 90 күнге бекіту ұсынылды. Өнімнің бұл түрі әлеуметтік маңызы бар азық-түлік тауарларының тізіміне кіреді, деп хабарлайды Qyzyljarnews.kz тілшісі.
Қаулы жобасы ашық нормативтік-құқықтық актілер сайтында жарияланды. Түсіндірме жазбада екінші тоқсанда айранның бағасы 235 теңгені құрайтыны көрсетілген. Дүкен сөрелеріндегі статистикалық бағасы — 272 теңге. Осылайша, шекті бағадан 15,7% — ға асқан. Мұндай жағдайда жергілікті атқарушы органдар шекті рұқсат етілген бөлшек сауда бағаларының мөлшерін белгілейді.
— Орташа бағаның өзгеруіне шикізаттың қымбаттауы әсер етті. Оның ішінде пленка – 76% – ға, қаптайтын материалдар — 30% – ға, ашытқы – 36% – ға, тұрақтандырғыштар — 13% — ға, жуу құралдары — 23% — ға, жабдыққа қосалқы бөлшектер — 50% — ға. Комиссия жүргізген талдау қорытындысы бойынша айранға шекті рұқсат етілген бөлшек сауда бағаларының мөлшерін бекітудің экономикалық қажеттілігі анықталды, — делінген түсіндірме жазбада.
Әкімдікте жұмсақ қаптамадағы майлылығы 2,5% айран литрінің бағасын алдағы 90 күнге 272 теңге деңгейінде бекіту ұсынылды.
Фото: ашық дереккөздерден
