Қайғылы оқиға «Челябі-Новосібір» тасжолының 498-ші шақырымында Мамлют ауданының Покровка ауылы маңында орын алды, деп хабарлайды Qyzyljarnews.kz тілшісі.
29 сәуірге қараған түні 50 жастағы Ресей азаматы тізгіндеген «Mitsubishi Canter» рефрижераторы «Honda» скутерімен соқтығысқан. Скутер жүргізушісі – Мамлютка қаласының 38 жастағы тұрғыны оқиға орнында қаза тапты.
Аталған факті Қазақстан Республикасы Қылмыстық кодексінің 345-бабы 3-бөлігі «Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы» бойынша Сотқа дейінгі тергеп-тексерулердің бірыңғай тізіліміне енгізілді. Қажетті сараптамалар тағайындалды.
Тайынша ауданы мен Петропавлда да екі дөңгелекті көліктің қатысуымен болған жол-көлік оқиғалары тіркелді. Жүргізушілер мен жолаушылар жапа шекті. Жыл басынан облыс жолдарында скутерлер жүргізушілерінің қатысуымен 3 жол-көлік оқиғасы анықталды.
СҚО ПД баспасөз қызметінен
