Қазақстан Республикасының Премьер-Министрі Әлихан Смайылов еліміздің солтүстік өңіріне Ресейден газ тартуға қыруар қаржыны қажет ететінін айтты, деп хабарлайды Qyzyljarnews.kz тілшісі.
Қазақстан-Ресей жұмыс тобының отырысы барысында Ресей тарапы коммерциялық баға бойынша газ сатып алу шартымен Қазақстанның солтүстік және шығыс өңірлерін газдандыру нұсқаларын қарауға дайын екенін атап өтті.
-Бүгінгі таңда газдың бағасын анықтау бойынша есептеулер жүргізілуде. Газдандырудың баламалы нұсқаларын қарастыру мақсатында Қазақстан Ресей Федерациясынан сұйытылған табиғи газды жеткізу арқылы газдандыру нұсқасын зерделеуді ұсынды. Сонымен қатар, бұл нұсқа сығымдау және қайта газдандыру бойынша инфрақұрылым құрылысына салымдарды талап етеді, — деп хабарлады Министр.
«Сарыарқа» газ құбырының «Нұр-Сұлтан – Көкшетау – Петропавл» учаскесінде «Мемсараптаманың» ескертулерін жою бойынша жұмыстар жүргізілуде. Премьер-Министрдің айтуынша, кешенді ведомстводан тыс сараптама қорытындысын маусым айының соңына дейін алу жоспарланып отыр.
Фото: ашық дереккөздерден
