Солтүстік Қазақстан облысының тұрғыны жұбайына мекемеде 2500 теңге беруге тырысып, бір жылға кездесу мүмкіндігінен айырылды, деп хабарлайды Qyzyljarnews.kz тілшісі.
Солтүстік Қазақстан облысы бойынша қылмыстық-атқару жүйесі департаментінің мекемелеріне ұзақ мерзімді кездесулерге келген сотталғандардың туыстарына рұқсат етілген заттар тізімі туралы ұдайы айтылғанымен, тыйым салынған заттарды мекеме аумағына әртүрлі тәсілдермен әкеліп, өткізуге тырысады.
СҚО бойынша ҚАЖД ЕС-164/3 мекемесіне жұбайымен ұзақ кездесуге келген әйел адамның жеке заттарын тексеру кезінде жазба кітапшасынан 2500 теңге сомасында ақша табылды.
— Аталған факті бойынша ҚР ӘҚБтК-нің 481-бабы бойынша материал жиналып, шешім қабылдау үшін Петропавл қаласының мамандандырылған әкімшілік сотына жіберілді. Қалалық мамандандырылған әкімшілік сотының қаулысымен әйелге «ескерту» жасалып, жұбайымен кездесуге бір жыл шектеу қою түрінде әкімшілік жаза қолданылды, — деді СҚО бойынша ҚАЖД бастығы Рустан Ахметжанов.
Егер бұл жағдай қайталанатын болса 20 АЕК мөлшерінде айыппұл салынады немесе ҚР ӘҚБтК-нің 481-бабының 2-бөлігіне сәйкес 30 тәулікке дейін қамауға алынады.
Фото: ашық дереккөздерден.
