Петропавлда 6 жастан 14 жасқа дейінгі балалар үшін жазғы академия жұмысын бастады. Білім алушылар 3 ай бойы оқушылар сарайында уақытын пайдалы әрі көңілді өткізбек. Олар үшін екі ауысымда 5 маусым ұйымдастырылады, деп хабарлайды Qyzyljarnews.kz тілшісі.
Оқушылар сарайында балалар жаңа технологиялардың қыр-сырын меңгере алады. Бұл мақсатта түрлі бағыттағы үйірмелер өткізіледі. Мұнда ІТ-бағыт бойынша сабақтар, ғылыми зертханалар, бизнес-мектеп, көркем-эстетикалық бағыт бойынша сабақтар да қарастырылған.
-Бүгінде робототехника, 3-D модельдеу, цифрлық дизайн, сәнді қолөнер, спорттық сабақтар жүріп жатыр. Бүгін ашылу салтанаты өтті, — дейді жазғы академияның директоры Нұрзия Майлина.
Жазғы академияның 1 маусымында, яғни 10 күн бойы 170 баладан демалады деп жоспарланып отыр. Биыл балалар демалысын ұйымдастыруға куратор ретінде студент-педагогтар көмектеседі.
Фото: ашық дереккөздерден
