Петропавлдағы Назарбаев Зияткерлік мектебінде NIS мұғалімдері мен қызметкерлерінің дәстүрлі желілік спартакиадасы өтті. Осы жолғы спорт додасы білім ошағының ұстазы Дәулет Тоққожинді еске алуға арналды, деп хабарлайды Qyzyljarnews.kz тілшісі.
Спорт сайысына NIS желісіне кіретін Алматы, Көкшетау, Нұр-Сұлтан, Орал, Тараз қалаларының физика-математика бағытындағы және Қарағанды мен Петропавл қалаларының химия-биология бағытындағы Назарбаев Зияткерлік мектептерінің құрама командалары және СҚО бұқаралық ақпарат құралдары қызметкерлерінің командасы қатысты.
– Спорттық шараға күш сынасуға келген құрамалар әріптестерімен де жақынырақ танысып, ұжымдық рухымыз күшейе түсетініне сенімдімін. Жолдың алшақтығына қарамастан, жер-жерден құрамалар арнайы келіп, бақтарын сынауда. Баршаңызға сәттілік, – деді Петропавлдағы НЗМ директоры Данияр Уәлиев.
Спартакиаданың алғашқы күнінде қатысушылар волейбол, шахмат, тоғызқұмалақ және үстел теннисінен бақ таластырды. Волейбол құрамалары А және В тобында өнер көрсетіп, араларындағы ең мықтылары, іріктеуден соң жартылай финалда кездесті. Осылайша А тобында Нұр-Сұлтан халықаралық мектебінің және Көкшетау физика-математика бағытындағы Назарбаев Зияткерлік мектебінің, ал В тобында Петропавл мен Тараз қалаларының зияткерлік мектептерінің құрамалары суырылып алға шықты. Ақтық ойындарда алаң иелері мен тараздықтар үшінші орын үшін таласқа түсіп, алаң иелері қонақтарға есе жіберіп алды. Ал бірінші орынға елордалық мектеп жайғасып, Көкшетау қаласының командасы, екінші орынан көрінді.
– Жарысқа жақсы дайындықпен келдік. Командалардың арасында Көкшетау мықты болды. Іріктеуде де, ақтық сында да Көкшетаумен тартысты ойын өтті. Бірінші орынды иеленіп отырмыз. Бұл колманданың ауыз біршілігінің арқасы деп ойлаймын, – дейді Нұр-Сұлтан қаласының халықаралық мектебінің ойыншысы Мырзағали Алишев.
NIS қызметкерлерінің желілік спартакиадасы арқан тарту ұлттық ойынымен қорытындыланды. Мұнда әр құраманың ең мықты деген 6 ойыншысы бағын сынады. Бұл жолы алаң иелері алдарына жан салмай, бірінші орынды еншіледі. Елордалық топ күміс жүлдені, ал көкшетаулықтарға үшінші орын бұйырды.
Дода қорытындысы бойынша жалпы командалық есепте Алматы қаласының физика-математика бағытындағы Назарбаев Зияткерлік мектебінің құрамасы үшінші орынды және Дәулет Тоққожиннің туыстары мен жолдастары тіккен 100 мың теңгелік сертификатты иеленді. Екінші орынға алаң иелері Петропавл қаласының құрамасы көтерілді. Оларға кубок және сыйлық ретінде 120 мың теңге бұйырды. Ал спартакиаданың кубогы Нұр-Сұлтан қаласының халықаралық мектебіне табыстылды. Чемпион құрама 150 мың теңгенің сертификатын иеленді. Бұдан бөлек, үздік ойыншылар да арнайы номинациялар мен Дәулет Тоққожиннің студенттік достары тағайындаған 20 мың теңгелік ақшалай сыйлықтардың иесі атанды.
Фото: НЗМ баспасөз қызметінен
