«BI Group» корпорациясы еліміздің бес өңірінде тұрғызған модульдік ауруханалар бойынша жүргізілген аудиттің қорытындысы шықты. Бұл туралы Қазақстан Республикасының Премьер-Министрі Әлихан Смайылов мәлімдеді, деп хабарлайды Qyzyljarnews.kz тілшісі.
Тексерілген клиникалардың қатарында Петропавлдағы модульдік аурухана да бар. Онда 7 миллиард теңге негізсіз жұмсалғаны анықталды.
— СҚО бойынша ішкі мемлекеттік аудит департаменті 2021 жылы жүргізген аудит нәтижелері бойынша «СҚО әкімдігінің құрылыс басқармасы» мекемесі мен «KAZPAKO» ЖШС арасында 2020 жылғы 19 тамызда Петропавл қаласында жалпы сомасы 7 038 000 теңгеге 200 төсекке арналған модульдік аурухана кешенін сатып алу бойынша Мемлекеттік сатып алу туралы шарт жасалғанын анықтады. Бұл ретте мемлекеттік органдарда бухгалтерлік есеп жүргізу ережелерін бұзу анықталды, — деді Әлихан Смайылов.
Сондай-ақ инфекциялық модульдік аурухананы ұстауға жұмсалған шығыстардың мақсатын анықтау бойынша «СҚО фтизиопульмонология орталығы» ШЖҚ КМК-да тексеріс жүргізілді. Оның қорытындысы бойынша жалпы сомасы 7 067 844,1 мың теңгеге қаржылық бұзушылықтар анықтады.
Аудит қорытындысы бойынша құны 7 038 000 мың теңгеге салынған модульді аурухана ғимараты кәсіпорын балансына қабылданды. 29 844,1 мың сомасындағы коммуналдық қызметтер бойынша шығындарды өтеу үшін кәсіпорын «KAZPAKO» ЖШС-дан шығындарды өндіріп алу туралы талап арыз берілді.
Фото: Талғат Тәнібаев.
