Петропавлда 50-ден астам ерікті «Есірткісіз қала» стрит-арт акциясына қатысты. Іс-шара нашақорлықтың алдын алу бойынша республикалық айлық шеңберінде ұйымдастырылды, деп хабарлайды Qyzyljarnews.kz тілшісі
Петропавл қаласының әкімдігі, СҚО іскер әйелдер кеңесі, қоғамдық қауіпсіздіктің ведомствоаралық тобы, облыстық есірткі қылмысына қарсы іс-қимыл басқармасы өкілдері «Динамо» стадионында жиналды.
Қалалық полицияның ерікті көмекшілер жасағы, сондай-ақ облыстық кәсіби-педагогикалық колледжінің еріктілеріне есірткі жарнамасын ерекше жолмен бояу арқылы сурет салу қажет болатын. Оларға суретші Мәдина Бакина көмектесіп, қабырғадағы жазбаларды қылқалам мен баллон көмегімен стрит-арт стиліндегі түрлі-түсті панноға қалай айналдыруға болатынын көрсетті.
Сондай-ақ, еріктілер есірткі қылмысына қарсы іс-қимыл басқармасының жедел уәкілдерімен бірге орталық қалалық саябақты аралап, жарнамаларды бояды. Тротуарларға салауатты өмір салтына шақыратын мәтіндер және есірткіге қарсы қызметтің байланыс деректері салынды.
СҚО есірткі қылмысына қарсы іс-қимыл басқармасының бастығы Жандос Басыбаевтың айтуынша, нашақорлықтың алдын алу жұмысы басым бағыттардың бірі. Республикалық айлық шеңберінде аталған жұмыс күшейтілді. Бұған дейін есірткі қылмысына қарсы іс-қимыл басқармасының қызметкерлері жастарға қаланың ең ірі кинотеатрына жаппай кинокөрсетілім, кинологиялық орталыққа экскурсиялар, арнайы сабақтар, дөңгелек үстелдер, акциялар ұйымдастырды. 26 маусым – Халықаралық нашақорлыққа қарсы күрес күніне дейін полицейлер танымал спортшылардың қатысуымен жаппай жүгіруді, сондай-ақ ашық аспан астында концерт өткізуді жоспарлап отыр.
Жыл басынан бері СҚО-да 99 есірткі қылмысы тіркелді, 60 адам қылмыстық жауапкершілікке тартылды. Заңсыз айналымнан 18 келіден астам түрлі есірткі заты, оның ішінде 1 келіден астам түрлі синтетикалық есірткі тәркіленді.
Фото: СҚО ПД баспасөз қызметінен.
